La face du ciel a esté tant de fois defigurée par Cometes barbues, chevelües,
torches, flambeaux, colomnes, lances, boucliers, dragons, duplication de Lunes, de Soleils, & autres.
L'antiquité n'a rien expérimenté de plus prodigieux en l'air que la Comete horrible de couleur de sang
qui apparut en Uvestrie l'unziesme jour d'Octobre 1527.
Ceste Comete estoit si horrible & espoventable, qu'elle engendroit si grande terreur au vulgaire,
qu'il en mourut aucuns de peur, les autres tomberent malades.
Ceste estrange Comete fut veuë de plusieurs milliers de personnes, & dura une heure & un quart.
Elle commença à se produire du costé du Soleil-levant, puis tira vers le midy, l'Occident & le Septentrion.
Elle apparoissoit estre de longueur escessive & si estoit couleur de sang.
A la sommité de la Comete on voyoit le caractere & la figure d'un bras courbé tenant une grande espée en sa main,
comme s'il eust voulu frapper. Au bout de la poincte de ce cousteau, il y avoit trois Estoilles
mais celle qui estoit droictement sur la poincte, estoit plus claire & lucide que les autres.
Aux deux costés des rayons de ceste Comete,
il se voyoit grand nombre de haches, couteaux, espées coulourées de sang,
parmy lesquelles il y avoit grand nombre de faces humaines hideuses,
avec les barbes & cheveux hérissés, comme tu la vois icy figurée.
Quelque temps après que ceste prodigieuse planette fut apparue,
toutes les parties de l'Europe furent presque baignées de sang humain.